حطمنا الاقام ديما مغلوبين
هم الزمان صعيب يا ما شيب راس
طيح وهبط بارجال ونساويـــــــــــن
من المقهي للسوق والحديث قياس
غير نكالي حيوط هذي اعوام وسنين
كيف الربح يجي ونعيشوا لاباس ?
ووقتاش رايح نفيق ?زعمة مسلمين
دم الشهدا اعلاش اليوم ارخاس?
عيب علينا وعار ننسى للوالدين
واش قيمة مفام بلا ســــــــــــــــاس
عمره الشكل اغنى للي وحهه شين
شعبنا معروف يا ذل اجنـــــــــــــاس
ركع لفرنسا قبل الوقت يحيـــــــن
واش اللي خلاه لا هرواة لافاس?
ما يعرف كيفاش قوته يجيب ومنين?
قريب لعشر سنين قطعنا منه الياس
يمشي على كرشه كيف لحنش مسكين
حشمتك بالله كاشمة معاك اقراص?
كاشمة سيروات تنفع مغبونيـــــــن?
نصلي في رمضان نبركه كي يخلاص
وبعد الحج نهج نولي شياطيــــــــــن
هاك تشوف في الدم وتشوف الاحباس
منين رايحين احنا نغرق للوذنيـــــــن
يا ما صالونات فيها ندير اعـــــــــــراس
جتى اللي ما امشاو صاروا شطاحين
ورا كورتاج كورتاج وغير الميسيداس
نجري ورا لبنات بيهم مشغوليــــــن
في السرقة وles blagues والله نجيب الكاس
حطمنا الاقام ديما مغلوبيــــــــــــــــــن
*********************************************
خطوة..خطوة
خطوة..خطوة احنا نمشي للقدام
لشمال ويمين تدي فينا الريــــــح
ما يخفاش عليك هذي سنين واعوام
عمرنا ميزنا بين مليح وقبيــــــــــــح
ما عرفنا لحلال..ما عرفنا لحرام
حتى الشيخ اليوم عاد مسكين يجيح
في رمضان نصوم نصلي ورا الامام
وقبل العيد ندير من الصلاة ذبيــــح
يوم الوقوف هناك نسبق للاقوام
نشبك بالكعبة...نبكي حتى نطيح
بصح غيبر نرجع ندخل في تحرام
نتعرى من مخيط راه كلامي صحيح
حشمتك بالله تفسر لي الاحلام
وتفتي لي ولو على دين المسيح
واش من جنس احنا?ما نا من الانعام
ما نا كالجماد عن طبعه ما يميـــــح
زعمة متقدمبن?فينا غير الافــــوام
واش قدمنا تراش هاو الوطن جريح?
اشكون اسباب الدا تفشى في العظام?
وكبف امسينا القتل ليل نهار نبيح?
مرت خمس سنين بكمالها وتمام
نشيع للموتى يا خسارة بشطيح
******************************************
ابكي ياعيني
شعبنا معروف خالق معجزات
واش اللي خلاه يستورد الابره?
ياخي الاستقلال جبنا بارادات
وخرجنا العديان...ذوك الكفرة ?
ياخي زعمة احنا علينا رايات
وقداش من مصنع وضعنا له حجرة?
قداش للعلوم بنينا جامعات?
وقداش بالدفيز سلكنا دكاتره?
ابكي ياعيني وجودي بالدمعات
ما يخفاش عليك..راني في حسرة
من ايام طوال قولي سنوات
مالكني التخمام وعايش في حيره
من يخدم لبلاد?يزي شعارات
ياك اللي جيعان ما يبغي هدره?
يزينا تسفسيط والمعيشة غلات?
يزينا تنفيق وغدره على غدره
كذاب من يقول درنا اصلاحات
سياسة فرق ظهرت مره اخرى
وكثرة الاحزاب ما تنفع..هيهات
يغرق البابور رياسه عشره
كثرة الاحزاب ما عندها باه جات
ولا دارت حاجة تنال بيها شهره
منذ اكتوبر واحنا في غصات
وبالعينين نشوف مناكر حمرا
من نبش القبور لحرق الوزنوات
ومن اضراب لاضراب على حساب الكسره
كل من هب ودب يحظى بموافقات
وما عليهش يحون ما يعرف يقرا
ما عليهش يخدم جهة من جهات
والا كان قومي ايام الثــــــــــوره
ما عليهش اذا جانا بفلسفات
قورباتشوف اليوم منها يتبرا
***********************************
لبلاد راهي خلات هذا ماوش كذب
يا سايلني واش تبغيني نقــــــــــول
ما ناش مسلمين وما بقيناش اعرب
افتح عينك شوف تلقانا بذيول
طوالو و\نينا وفي اخر الركب
تلقانا ناسيين لارواحنا على طول
ومتعودين اشحال حاجة تجيب السب
سباقين في اشطيح والضرب على طبول
وفي les blagues احنا عندك ما تحسب
على كروشنا نجري/شبابنا وكهول
ما نعد للطيحات وبهادل نكسب
في السرقة قداش جبنا من اصول
واشحال من مبدا عنه عجز الغرب
بالك يخدعك الكلام المعسول
لبلاد راهي خلات هذا ماوش كذب
من شعبيات العم ربيع
العرض العادي
